'I he uike ni 'oku faka'ilonga'i ai 'i Nu'usila ni 'a e mahu'inga 'o e lea faka-Tonga. 'Oku fakafiefia 'aupito 'a e mamata atu ki he'etau fanau Tonga 'oku nau polepole honau tupu'anga 'aki 'enau lea 'aki e lea faka-Tonga, hiva faka-Tonga pea nau toe teki faiva foki.
'Oku fakafiefia ko e 'iai mo e ngaahi naunau kuo fa'u 'o fakatau 'i he 'initaneti ke tokoni ki he kau faiako ki hono ako'i e fanau tautefito ki he kau faiako 'oku 'ikai ke nau lea faka-Tonga. Ko e ki'i kole pe fekau'aki mo e ngaahi naunau ko eni ke toe fakatokanga'i ange hono liliu e ngaahi lea 'oku 'i ai e ngaahi lea ia ai 'oku 'ikai ke 'iai ha'atau ngaahi lea pehe 'a kitautolu. Kapau ko e feinga ke paotoloaki 'etau lea pea 'oku mahu'inga ke fakatonutonu pea toki tuku mai he 'e ma'u hala aipe e ngaahi matakali kehe 'etau lea. Ko e ki'i sipinga eni ne u fakatokanga'i ko e fo'ilea ko e fanongo ne 'ai ia ko e fanono mo e ngaahi lea kehe pe ne fehalaaki ka 'oku 'ikai ke tonu ke pehe he 'oku totongi pa'anga kae toki lava 'o ma'u.
'Oku 'ikai foki ke mau ma'u ha faingamalie tatau hange ko ia ko e ngaahi ako lautohi 'e ni'ihi 'oku fakalele faka-Tonga e ngaahi lesoni ke mau ma'u ha faingamalie ke ako pea faka'ali'ali ai e ngaahi teunga faka-Tonga pe faiva he ngaahi 'aho pehe ni. Ka neongo ia 'oku mau fiefia pe ke mau kaunga kau hono katoanga'i e uike mahu'inga ko eni 'o fakafou 'i he fekumi 'a e fanau fekau'aki mo e ngaahi tefoto'i fakakaukau 'oku nau faka'amau ke nau 'ilo kiai o 'ikai ngata pe he fanau Tonga ka 'oku kau ki ai mo e ngaahi matakali kehe foki.
'I lalo 'oku ha atu ai e ngaahi konga e fekumi 'a e fanau 'i loki ako fekau'aki mo honau fonua tupu'anga.
No comments:
Post a Comment